Gaty gysgajyk biografiýam. 

1969-a çenli hiç zat ýadyma düşenok.
1976-1984 aralygynda orta mekdebi okadym. 8 klas.
Şeýle hem 1980-1984 aralygynda Bäşim aga Nuralynyň adyny göterýän Çagalar çeperçilik mekdebine gatnadym. Mugallymym Afanasýewa Walentina Nikolaýewna. Bu ýerde okamda çagalar sergilerine gatnaşýardym, emma.ýer alanym ýadyma düşenok.
1984-den 1988-e çenli Şota daýy Rustaweli adyndaky Türkmen döwlet çeperçilik uçilişesinde belli sungaty öwreniji Abat Muhadowanyň kurs ýolbaşçylygynda wagtymy geçirdim. Ondan «Sungadyň taryhy» sapagynda dürli çeperçilik akymlaryny höwes bilen öwrendim. Näme üçindir primitiwistler, abstraksionistler we impressionistler we azajygam sürrealistler göwnümden turdy. Şol wagtlar türkmen abstraksionisti Tokar aga Tugurow bilen gatnaşyp başladym. Özümi erkin akymlarda barlap gördüm, emma üýtgeşik eden işim ýok. Üçilişäniň içindäki gurnalýan sergilere gatnaşsamam bu ýerde-de hiç hili ýer almadym. Käbir işlerim Metodiki fond tarapyndan uçilişäniň haýryna alyndy. Hudožnik Ýarly aga Baýramowyň synçylygynda «Ýaş balerinalar» ady bilen çeken diplom işim bilen bu okuw jaýyny hudožnik Daneşwar aganyň goly çekilen gan reňkli diplom bilen tamamladym. Soňra Moskwadaky Surikow adyndaky çeperçilik instituta okuwa synanyşdym. Geçmedim...
Şondan bärem öz göwnüm üçin surat çekýän. Az çekýän. Köplenç näme çekmelidigini däl-de näme üçin çekmelidigini bilemok.
Hiç hili sergilere gatnaşamok. Hiç bir galereýalarda, muzeýlerde we şahsy kolleksiýalarda suratlarym saklananok. Hiç hili hormatly atlarym ýok. Diňe öz-özüm üçin çeken suratlarym bar. Olar hem bu ýerde, bu sahypada. Isleseňiz synlaň...
Şeýle-de kä wagt güýmenje hökmünde gülkünç fotomontažlar edýän.
Web dizaýn hem bir güýmenjäm...
Üns bereniňiz üçin minnetdar.